డ్రగ్స్ రహిత సమాజం కోసం యువత అప్రమత్తంగా ఉండాలి: ఎస్పీ

జిల్లా ఎస్పీ షెల్కే నచికేత్ విశ్వనాధ్ ఐపిఎస్ మాట్లాడుతూ - జిల్లా వ్యాప్తంగా 'నషా ముక్త్ భారత్ అభియాన్' కార్యక్రమాలను చేపడుతూ, గంజాయి, డ్రగ్స్ వంటి నిషేధిత మత్తు పదార్థాల వినియోగం వలన కలిగే దుష్ప్రభావాలను ప్రజలకు, యువతకు వివరిస్తూ, అవగాహన కల్పిస్తున్నామన్నారు. ఇందులో భాగంగా నేడు ప్రజలకు, యువతకు అవగాహన కల్పించేందుకు నగరంలో సిగ్నేచర్ క్యాంపైన్ తో పాటు వాకథాన్ అవేర్ నెస్ ర్యాలీని చేపట్టామన్నారు.

ఎన్డిపిఎస్ చట్టం చాలా కఠినమైన చట్టమని, డ్రగ్స్ వాడడం, అమ్మడం, అక్రమ రవాణా చేయడం, కొనుగోలు చేయడం వీటన్నిటికీ చాలా కఠినమైన శిక్షలున్నాయన్నారు. జిల్లా పోలీస్ శాఖ నిరంతరం నిఘా ఉంచడం జరిగిందని, సోషల్ మీడియా, అంతర్ జిల్లా సరిహద్దు చెక్ పోస్ట్ ల వద్ద సాంకేతికమైన, మానవ ఇంటెలిజెన్స్ వ్యవస్థ ద్వారా నిరంతర నిఘా కొనసాగుతోందన్నారు.

ఇటీవలే కొత్తగా డ్రగ్స్ డిటెక్షన్ కిట్స్ జిల్లాకు వచ్చాయని, కడప నగరంతో పాటు జిల్లాలోని అన్ని సబ్ డివిజన్లలో ర్యాండమ్ టెస్టులు చేస్తున్నామని ఎస్.పి గారు తెలిపారు. నెల రోజుల వ్యవధిలో డ్రగ్స్, గంజాయి సేవించినా కిట్స్ ద్వారా నిర్వహించే యూరిన్ టెస్ట్ లో క్షణాల్లో పట్టిస్తుందన్నారు. టెస్టుల్లో పట్టు బడ్డ వారిపై కౌన్సిలింగ్ నిర్వహించడంతో పాటు వారిని జిల్లాలో ఉన్న రెండు డీ - అడిక్షన్ కేంద్రాలకు తరలించి వారిని మళ్ళీ మామూలు వ్యక్తులుగా మార్చేందుకు కృషి చేస్తున్నామని జిల్లా ఎస్పీ వివరించారు. గంజాయితో పట్టుబడితే వారిపై కేసులు నమోదు చేసి జైలుకు పంపడం జరుగుతోందన్నారు.

జిల్లాలో ఎక్కడా డ్రగ్స్ మహమ్మారి కనపడడానికి వీల్లేదని, మెడికల్ షాపుల్లో సైకోట్రోపిక్ టాబ్లెట్స్ కూడా వైద్యుల ప్రిస్క్రిప్షన్ లేకుండా విక్రయించిన వారిపై కేసులు నమోదు చేయడం జరిగిందని ఎస్పీ తెలిపారు. చాలామంది యువకులు, విద్యార్థులు గంజాయి వినియోగం వలన కలిగే దుష్ప్రభావాలు తెలియక, వారి జీవితాలను నాశనం చేసుకుంటున్నారన్నారు. గంజాయి ఒక నిషేధిత పదార్థమని, గంజాయిని కలిగి ఉన్నా, సేవించినా, ఇతరులకు సరఫరా చేసినా, రవాణ చేసినా, విక్రయించినా తీవ్రమైన నేరంగా పరిగణించి, అందుకు బాధ్యులైన వ్యక్తులను కేసుల్లో నిందితులుగా అరెస్టుచేయడం జరుగుతుందన్నారు. ఈ కేసుల్లో నేరం నిరూపణ అయితే బాధ్యులైన నిందితులకు కఠిన శిక్షలు విధించే అవకాశం ఉంటుందన్నారు.

ప్రజలందరూ డ్రగ్స్ రహిత సమాజ స్థాపనకు ఒక సామాజిక బాధ్యతతో కృషి చెయ్యాలన్నారు. గంజాయి, డ్రగ్స్ గురించిన సమాచారం ఉంటే టోల్ ఫ్రీ నంబరు 1972 లేదా డయల్ 100/112కు తెలపాలని ప్రజలకు, యువతకు జిల్లా ఎస్పీ షెల్కే నచికేత్ విశ్వనాధ్ ఐపిఎస్ విజ్ఞప్తి చేసారు.

జిల్లా పోలీస్ శాఖకు చెందిన నార్కోటిక్ బ్యూరో ఈ ఏడాది మాదక ద్రవ్యాల అక్రమ రవాణాపై కఠిన చర్యలు చేపట్టి 83 కేసులు నమోదు చేయడంతో పాటు, 185 కిలోల గంజాయిని స్వాధీనం చేసుకుని 263 మంది నిందితులను అరెస్ట్ చేయడం జరిగిందని జిల్లా ఎస్.పి వివరించారు.

విభిన్న ప్రతిభా వంతుల, ట్రాన్స్ జెండర్ల, సీనియర్ సిటిజెన్స్ వెల్ఫేర్ అసిస్టెంట్ డైరెక్టర్ ఆర్.వి కృష్ణ కిషోర్ మాట్లాడుతూ వై.ఎస్.ఆర్ కడప జిల్లా చారిత్రాత్మక విజయం సాధించిందని, అధికారిక నషా ముక్త్ భారత్ అభియాన్ గణాంకాల ప్రకారం సమాచారం, విద్య, అవగాహనా కార్యక్రమాల నిర్వహణలో ఆంధ్ర ప్రదేశ్ రాష్ట్రంలో ప్రధమ స్థానాన్ని సాధించిందని కరతాళ ధ్వనుల మధ్య ప్రకటించారు. జిల్లాలో మొత్తం 283 కార్యక్రమాల ద్వారా 6,10,350 మంది ప్రజలకు నషా ముక్త్ భారత్ అభియాన్ లో భాగంగా అవగాహన కల్పించడం జరిగిందన్నారు.

అనంతరం, గంజాయి, డ్రగ్స్ కు దూరంగా ఉంటామని యువత పెద్ద ఎత్తున నినాదాలు చేస్తూ నిర్వహించిన ర్యాలీని జిల్లా ఎస్పీ కోటిరెడ్డి సర్కిల్ వద్ద జెండా ఊపి ప్రారంభించగా, కోటిరెడ్డి సర్కిల్ నుండి ఏడు రోడ్ల కూడలి వరకు ర్యాలీని నిర్వహించి, మానవహారంగా ఏర్పడి, గంజాయి, డ్రగ్స్ కు వ్యతిరేకంగా ప్రతిజ్ఞ చేయించి నినాదాలు చేసారు.

ఈ కార్యక్రమంలో అదనపు ఎస్పీ (అడ్మిన్) కె.ప్రకాష్ బాబు, అడిషనల్ ఎస్పి ఏ.ఆర్ బి.రమణయ్య, డ్రగ్ కంట్రోల్ శాఖ అసిస్టెంట్ డైరెక్టర్ ఆశా, కడప ఇంచార్జ్ డిఎస్పీ ఇ.బాలస్వామి రెడ్డి, ఏ.ఆర్ డిఎస్పీ పి.నాగేశ్వర రావు, అసిస్టెంట్ కమిషనర్ వి.చంద్రశేఖర్ రెడ్డి, నార్కోటిక్స్ సి.ఐ గోవింద రెడ్డి, కడప నగరంలోని సి.ఐ లు, ఎస్.ఐ లు, మెప్మా, ఐసిడిఎస్, డి.ఎం అండ్ హెచ్.ఓ అధికారులు, స్వచ్చంద సంస్థలు, డీ అడిక్షన్ కేంద్రాల నిర్వాహకులు పాల్గొన్నారు.