కళ్యాణలక్ష్మి–షాదీ ముబారక్‌లో భారీ నకిలీ ధృవీకరణ పత్రాల మోసం బట్టబయలు…

జూలై 22న ప్రభుత్వ జిల్లా ఆసుపత్రి కామారెడ్డిలో ఆర్‌ఎంఓగా విధులు నిర్వహిస్తున్న డాక్టర్ చందారి సంతోష్ ఫిర్యాదు మేరకు ఈ కేసు నమోదైంది. తన పేరుతో, అధికారిక హోదాతో జారీ చేసినట్లు కనిపించే వయస్సు, మొదటి వివాహ ధృవీకరణ పత్రాలపై తనకు సంబంధం లేకుండా నకిలీ సంతకాలు చేసి, అధికారిక రబ్బరు ముద్రను దుర్వినియోగం చేస్తున్నారని ఆయన ఫిర్యాదులో పేర్కొన్నారు. ఈ నకిలీ పత్రాలను కళ్యాణలక్ష్మి, షాదీ ముబారక్ పథకాల కింద ఆర్థిక సహాయం పొందేందుకు ఉపయోగిస్తున్నట్లు వెల్లడించారు.

ఎస్పీ ఆదేశాల మేరకు కామారెడ్డి డీఎస్పీ మధుసూదన్ పర్యవేక్షణలో, కామారెడ్డి టౌన్ పోలీస్ స్టేషన్ ఎస్‌హెచ్‌ఓ నరహరి నేతృత్వంలో రెండు ప్రత్యేక దర్యాప్తు బృందాలు కేసును సాంకేతిక ఆధారాలతో విచారించాయి. ప్రభుత్వ వైద్యాధికారుల సంతకాలు, అధికారిక రబ్బరు ముద్రలను నకిలీగా ఉపయోగిస్తున్న వారిపై విస్తృతంగా దర్యాప్తు నిర్వహించి, సంబంధిత పత్రాలు, డిజిటల్ రికార్డులు సేకరించారు.

దర్యాప్తులో లభించిన సమాచారం ఆధారంగా పోలీసులు భిక్కనూరులోని లహరి జిరాక్స్ అండ్ ఆన్‌లైన్ సెంటర్‌పై తనిఖీలు నిర్వహించి ముగ్గురు నిందితులను అదుపులోకి తీసుకున్నారు. విచారణలో వారు నేరాన్ని ఒప్పుకున్నట్లు పోలీసులు తెలిపారు.

ప్రధాన నిందితులు తోడెంగల రాజా నరేందర్, తోడెంగల రాజలింగం భిక్కనూరులో నిర్వహిస్తున్న ఆన్‌లైన్ సేవా కేంద్రం ద్వారా కళ్యాణలక్ష్మి, షాదీ ముబారక్ పథకాల కోసం దరఖాస్తు చేసుకునే వారి నుంచి వివాహ పత్రికలు, ఆధార్ కార్డులు, కుల, ఆదాయ, నివాస ధృవీకరణ పత్రాలు వంటివి సేకరించి, ఒక్కో దరఖాస్తుకు రూ.4,500 నుంచి రూ.5,000 వరకు వసూలు చేసేవారు. అనంతరం ప్రభుత్వ జిల్లా ఆసుపత్రిలో ఔట్‌సోర్సింగ్ ఉద్యోగిగా పనిచేస్తున్న బోయిని ప్రసాద్‌తో కుమ్మక్కై, ప్రభుత్వ వైద్యాధికారుల అసలు సంతకాలు లేకుండానే వారి పేర్లతో నకిలీ సంతకాలు చేసి, నకిలీ అధికారిక రబ్బరు ముద్రలు ఉపయోగించి వయస్సు, మొదటి వివాహం వంటి ధృవీకరణ పత్రాలను తయారు చేసినట్లు దర్యాప్తులో తేలింది. ఆ పత్రాలను అసలైన ప్రభుత్వ ధృవీకరణ పత్రాలుగా చూపిస్తూ ఆన్‌లైన్‌లో దరఖాస్తులు సమర్పించి ప్రభుత్వ సంక్షేమ పథకాల ప్రయోజనాలను అక్రమంగా పొందేందుకు ప్రయత్నించినట్లు పోలీసులు వెల్లడించారు.

తోడెంగల రాజా నరేందర్ (భిక్కనూర్), తోడెంగల రాజలింగం (భిక్కనూర్), బోయిని ప్రసాద్ (భిక్కనూర్).

నిందితుల వద్ద నుంచి ఒక కంప్యూటర్ సీపీయూ, ఎల్‌సీడీ మానిటర్, కీబోర్డ్, మౌస్, మూడు మొబైల్ ఫోన్లు, నకిలీ అధికారిక రబ్బరు ముద్రలు, స్టాంప్ ప్యాడ్, నకిలీ సంతకాల కోసం ఉపయోగించిన పెన్నులు, కంప్యూటర్‌లో భద్రపరిచిన దరఖాస్తుల డిజిటల్ రికార్డులు, ఇతర నేర సంబంధిత వస్తువులను పోలీసులు స్వాధీనం చేసుకున్నారు.

ఈ వ్యవహారంలో ఇప్పటివరకు అక్రమంగా సమర్పించిన దరఖాస్తుల సంఖ్య, ప్రభుత్వానికి జరిగిన ఆర్థిక నష్టం, సంబంధిత లబ్ధిదారుల వివరాలు, ఈ నేరంలో మరెవరైనా ప్రమేయం ఉందా అనే కోణంలో దర్యాప్తు కొనసాగుతోందని ఎస్పీ తెలిపారు. ప్రభుత్వ సంక్షేమ పథకాల దుర్వినియోగానికి పాల్పడే వారిపై కఠిన చర్యలు తప్పవని హెచ్చరించారు. ఈ కేసును సాంకేతిక ఆధారాలతో చాకచక్యంగా ఛేదించిన డీఎస్పీ మధుసూదన్, కామారెడ్డి టౌన్ ఎస్‌హెచ్‌ఓ నరహరి మరియు పోలీసు సిబ్బందిని జిల్లా ఎస్పీ ఎం. రాజేష్ చంద్ర ఐపీఎస్ అభినందించారు.