ప్రేమ మోసాలు, సైబర్ నేరాలపై విద్యార్థులకు పోలీసుల అవగాహన

కామారెడ్డి జిల్లా ప్రజా పరిషత్ గంజ్ హైస్కూల్‌లో గురువారం జిల్లా పోలీసు శాఖ ఆధ్వర్యంలో విద్యార్థులకు సామాజిక అవగాహన కార్యక్రమం నిర్వహించారు. జిల్లా ఎస్పీ ఎం. రాజేష్ చంద్ర, ఐపీఎస్ ఆదేశాల మేరకు ఈ కార్యక్రమం జరిగింది.

ఈ కార్యక్రమంలో ప్రేమ పేరుతో జరిగే మోసాలు, మైనర్ డ్రైవింగ్, మాదకద్రవ్యాల నిర్మూలన, సైబర్ నేరాలు, మైనర్లపై జరిగే నేరాలు, మానవ అక్రమ రవాణా వంటి అంశాలపై విద్యార్థులకు విస్తృతంగా అవగాహన కల్పించారు.

సోషల్ మీడియా వేదికలైన ఇన్‌స్టాగ్రామ్, ఫేస్‌బుక్‌లను జాగ్రత్తగా వినియోగించాలని, అపరిచితులను నమ్మి మోసపోవద్దని సూచించారు. తల్లిదండ్రులు, ఉపాధ్యాయుల సూచనలు పాటిస్తూ ఉన్నత లక్ష్యాలతో చదువుకోవాలని విద్యార్థులకు సూచించారు.

అత్యవసర పరిస్థితుల్లో 100/112, సైబర్ మోసాల కోసం 1930, మాదకద్రవ్యాల సమాచారం కోసం 1908, షీ టీమ్ సహాయం కోసం 8712686094 నంబర్లను వినియోగించాలని వివరించారు.

పోలీసు కళాబృందం ఇన్‌చార్జి హెడ్ కానిస్టేబుల్ రామంచ తిరుపతి, హెడ్ కానిస్టేబుల్ యు. శేషరావు, పీసీలు ప్రభాకర్, సాయిలు పాటలు, మాటల రూపంలో సందేశాలు అందించారు. హెడ్‌మాస్టర్ శారద, పీసీ రాజేందర్, ఉపాధ్యాయులు, విద్యార్థినులు కార్యక్రమంలో పాల్గొన్నారు.