నెల్లూరులో తప్పిపోయిన ఇద్దరు చిన్నారుల ఆచూకీ.. గంటల్లోనే గుర్తించిన ప…

జిల్లా ఎస్పీ ఎల్. సుబ్బారాయుడు, ఐపీఎస్ ప్రత్యక్ష పర్యవేక్షణలో వేగవంతమైన పోలీస్ ఆపరేషన్ చేపట్టారు.

జిల్లా ఎస్పీ ఎల్. సుబ్బారాయుడు, ఐపీఎస్ ఆదేశాలు, ప్రత్యక్ష పర్యవేక్షణలో తిరుపతి జిల్లా పోలీసులు అత్యంత వేగంగా స్పందించి, తప్పిపోయిన ఇద్దరు చిన్నారులను గంటల వ్యవధిలోనే నెల్లూరులో సురక్షితంగా గుర్తించి వారి తల్లిదండ్రులకు క్షేమంగా అప్పగించారు.

తుమ్మలగుంట ప్రాంతానికి చెందిన లిఖిత్ సాయి (12), ఉదయ్ సాయి (8) స్కేటింగ్‌కు వెళ్తున్నట్లు ఇంటి నుంచి బయలుదేరి, రైల్వే స్టేషన్‌లో సైకిళ్లను ఉంచి ఎవరికీ చెప్పకుండా నరసాపూర్ ఎక్స్‌ప్రెస్ రైలులో వెళ్లిపోయారు. పిల్లలు ఇంటికి తిరిగి రాకపోవడంతో కుటుంబ సభ్యులు వెంటనే ఎం.ఆర్.పల్లి పోలీస్ స్టేషన్‌లో ఫిర్యాదు చేశారు.

సమాచారం అందిన వెంటనే జిల్లా ఎస్పీ గారు పోలీస్ యంత్రాంగాన్ని అప్రమత్తం చేసి, ఎస్బీ కంట్రోల్ రూమ్, సంబంధిత డీఎస్పీలు, అన్ని పోలీస్ స్టేషన్లు, జీఆర్పీ అధికారులతో సమన్వయం ఏర్పాటు చేశారు. చిన్నారుల ఫోటోలు, వివరాలు అన్ని యూనిట్లకు పంపించడంతో పాటు, మొబైల్ ఫోన్ లొకేషన్ ఆధారంగా వారు నాయుడుపేట, గూడూరు మీదుగా నెల్లూరు వైపు వెళ్తున్నట్లు గుర్తించారు.

తక్షణ సమన్వయ చర్యలతో నెల్లూరు రైల్వే స్టేషన్‌లో నరసాపూర్ ఎక్స్‌ప్రెస్ రైలులో ప్రయాణిస్తున్న చిన్నారులను పోలీసులు సురక్షితంగా గుర్తించి అదుపులోకి తీసుకుని, అనంతరం క్షేమంగా వారి తల్లిదండ్రులకు అప్పగించారు.

తమ పిల్లలను గంటల వ్యవధిలోనే సురక్షితంగా గుర్తించి అప్పగించినందుకు చిన్నారుల తల్లిదండ్రులు జిల్లా ఎస్పీ ఎల్. సుబ్బారాయుడు, ఐపీఎస్.కి, ఈ ఆపరేషన్‌లో పాల్గొన్న పోలీస్ అధికారులు, సీఐ మద్దయ్యాచారికి, ఎస్ఐ లోకేష్, సిబ్బందికి కృతజ్ఞతలు తెలిపారు.

ఈ సందర్భంగా జిల్లా ఎస్పీ సమాచారం ఇస్తూ, పిల్లలు ఇంటి నుంచి బయటకు వెళ్లే సమయంలో తల్లిదండ్రులు తప్పనిసరిగా జాగ్రత్త వహించాలని, చిన్నారుల కదలికలపై నిరంతరం అప్రమత్తంగా ఉండాలని సూచించారు. అత్యవసర పరిస్థితుల్లో వెంటనే డయల్-112 లేదా సమీప పోలీస్ స్టేషన్‌ను సంప్రదించాలని ప్రజలకు విజ్ఞప్తి చేశారు.