నీట్ పరీక్షలో ఆల్ ఇండియా 91వ ర్యాంక్‌తో హైదరాబాద్‌కు చెందిన రుటుంబిక…

రుటుంబిక తండ్రి ప్రదం కుమార్ మొహంతి జీవనోపాధి కోసం ఒడిశా రాష్ట్రం నుండి వచ్చి భాగ్యనగరంలో స్థిరపడ్డారు. ఇక్కడ ఆయన సివిల్ కాంట్రాక్టర్‌గా రాణిస్తున్నారు. వ్యాపారంలో ఎన్ని ఒడిదొడుకులు ఉన్నప్పటికీ, పిల్లల చదువుకు మాత్రం ఆయన ఎప్పుడూ ప్రాధాన్యతనిచ్చారు. తండ్రి కష్టాన్ని, ఆయన ఆశయాలను కళ్లారా చూసిన రుటుంబిక.. చదువునే తన ఆయుధంగా మార్చుకుంది. చిన్నప్పటి నుండి చదువులో అత్యంత ప్రతిభ కనబరిచిన ఆమె, నీట్ పరీక్షలో జాతీయ స్థాయిలో 91వ ర్యాంక్ సాధించి తన కలని సాకారం చేసుకుంది.

కూతురి సాధించిన ఈ అసాధారణ విజయంతో తండ్రి ప్రదం కుమార్ మొహంతి ఆనందానికి అవధులు లేవు. ఈ సందర్భంగా ఆయన మాట్లాడుతూ.. "ఒక తండ్రిగా నా కూతురు సాధించిన విజయాన్ని చూసి నా గుండె గర్వంతో ఉప్పొంగిపోతోంది. ఒడిశా నుంచి వచ్చి హైదరాబాద్‌లో స్థిరపడిన మాకు, నా కూతురు ఇంతటి గొప్ప గౌరవాన్ని తెచ్చిపెడుతుందని ఊహించలేదు. రాత్రింబవళ్లు తను పడిన కష్టానికి తగిన ప్రతిఫలం దక్కింది. ఈ విజయం కేవలం తన ఒక్కదానిదే కాదు, ఆమెకు అండగా నిలిచి విద్యాబుద్ధులు నేర్పిన గురువులది కూడా" అంటూ భావోద్వేగానికి లోనయ్యారు.

చదువులో నిరంతరం ప్రోత్సహిస్తూ, ప్రతి దశలోనూ గైడెన్స్ ఇచ్చిన కాలేజీ యాజమాన్యం మరియు అధ్యాపకులకు రుటుంబిక ఈ విజయాన్ని అంకితం ఇచ్చింది. సబ్జెక్టులపై పట్టు సాధించేలా ఉపాధ్యాయులు చేసిన మార్గదర్శకత్వమే తను ఈ రోజు జాతీయ స్థాయి టాప్-100 లో నిలవడానికి కారణమని ఆమె కృతజ్ఞతలు తెలిపింది. ఒక వైపు తండ్రి శ్రమ, మరోవైపు గురువుల శిక్షణ, వీటన్నింటికీ తోడు రుటుంబిక నిరంతర సాధన వెరసి ఈ రోజు ఆమెను దేశంలోనే అత్యుత్తమ వైద్య విద్యార్థుల సరసన నిలబెట్టాయి. భవిష్యత్తులో దేశానికి సేవ చేసే గొప్ప వైద్యురాలిగా రుటుంబిక ఎదగాలని, మరిన్ని విజయాలు సాధించాలని బంధుమిత్రులు, కాలేజీ సిబ్బంది ఆకాంక్షిస్తున్నారు.