బాలికలు ఆత్మరక్షణ విద్య నేర్చుకోవాలి: డీఎస్పీ బుచ్చిరాజు

రాణి లక్ష్మీబాయి స్ఫూర్తితో బాలికలు ఆత్మరక్షణ విద్యను తప్పనిసరిగా నేర్చుకోవాలని డీఎస్పీ బుచ్చిరాజు పిలుపునిచ్చారు. మదనపల్లె బాలికోన్నత పాఠశాలలో సమగ్రశిక్ష ఆధ్వర్యంలో గురువారం రాణి లక్ష్మీబాయి ఆత్మరక్షా శిక్షణా కార్యక్రమాన్ని ప్రారంభించారు.

ఈ కార్యక్రమంలో ముఖ్య అతిథిగా పాల్గొన్న డీఎస్పీ బుచ్చిరాజు మాట్లాడుతూ, బాలికలు తమను తాము రక్షించుకోవడానికి ఆత్మరక్షణ విద్య ఎంతగానో ఉపయోగపడుతుందని అన్నారు. సమగ్రశిక్ష ఆధ్వర్యంలో ఈ శిక్షణా కార్యక్రమం ఏర్పాటు చేయడం అభినందనీయమని తెలిపారు. జిల్లాలోని మొత్తం 228 పాఠశాలల్లో 6 నుంచి 12వ తరగతి వరకు చదువుతున్న బాలికలకు ఈ శిక్షణ అందించనున్నారు. నాలుగు నెలల పాటు జరిగే ఈ కార్యక్రమంలో మొత్తం 30 సెషన్లు ఉంటాయి. దీని ద్వారా బాలికల్లో ఆత్మవిశ్వాసం పెరిగి, తమను తాము కాపాడుకునే నైపుణ్యాలు మెరుగుపడతాయని అధికారులు తెలిపారు. ఈ కార్యక్రమంలో డీఈవో సుబ్రహ్మణ్యం, ఏపీసీ అనూరాధ కూడా పాల్గొన్నారు. బాలికల భద్రత మరియు సాధికారతకు ఈ శిక్షణ దోహదపడుతుందని వారు ఆశాభావం వ్యక్తం చేశారు.