విద్యార్థి, యువజన సమస్యలపై ఐక్య ఉద్యమాలు: కడపలో పీఆర్ఎస్వైఎఫ్ రాష్ట్ర మహాసభలు

ఈ మహాసభలకు శాసనమండలి సభ్యులు ఎమ్మెల్సీ రామచంద్రారెడ్డి, ప్రైవేట్ విద్యాసంస్థల అసోసియేషన్ రాష్ట్ర అధ్యక్షులు జోగి రామిరెడ్డి, జాతీయ చేతివృత్తుల ఐక్యవేదిక జాతీయ అధ్యక్షులు ఆవారు మల్లికార్జున, జనతాదళ్ (ఎస్) రాష్ట్ర అధ్యక్షులు ప్రతాపరెడ్డి, అఖిల భారత విద్యార్థి బ్లాక్ (ఏఐఎస్బీ) జాతీయ కన్వీనర్ జయవర్ధన్, ప్రగతిశీల విద్యార్థి సంఘం (పీఎస్యు) రాష్ట్ర కార్యదర్శి సుబ్బరాయుడు, ఎస్సీ సంక్షేమ సంఘం రాష్ట్ర అధ్యక్షులు ఆర్యన్ రాజా, దళిత మిత్ర వ్యవస్థాపకులు కైపు రామాంజనేయులు, బహుజన ఐక్యవేదిక రాష్ట్ర అధ్యక్షులు సి.ఎస్. ఆంజనేయులు, లోక్సత్తా జిల్లా అధ్యక్షులు దేవర శ్రీకృష్ణ తదితరులు హాజరై ప్రసంగించారు.

విద్యారంగ సమస్యలపై ప్రభుత్వానికి విజ్ఞప్తి

రాష్ట్రంలో విద్యారంగం ఎదుర్కొంటున్న సమస్యలపై ప్రభుత్వాలు ప్రత్యేక దృష్టి సారించాలని వక్తలు కోరారు. ప్రభుత్వ విద్యాసంస్థలను బలోపేతం చేయడంతో పాటు విద్యార్థులకు నాణ్యమైన విద్య అందేలా చర్యలు తీసుకోవాలని అన్నారు. విద్యార్థులకు అందాల్సిన ఫీజు రీయింబర్స్మెంట్, స్కాలర్షిప్లు, వసతి సౌకర్యాలు తదితర అంశాలపై ప్రభుత్వం స్పష్టమైన చర్యలు తీసుకోవాల్సిన అవసరం ఉందని పేర్కొన్నారు. ప్రైవేట్ విద్యాసంస్థల్లో విద్యార్థులు ఎదుర్కొంటున్న సమస్యలకు పరిష్కారం చూపాలని, విద్యను వ్యాపారంగా మార్చే విధానాలకు అడ్డుకట్ట వేయాలని వక్తలు కోరారు.

ఉపాధి, సంక్షేమంపై డిమాండ్లు

విద్యార్థులు, యువజనులకు ఉపాధి అవకాశాలు కల్పించడంతో పాటు వారి హక్కులు, సమస్యల పరిష్కారం కోసం ప్రభుత్వాలు బాధ్యతాయుతంగా వ్యవహరించాలని అన్నారు. ముఖ్యంగా రాష్ట్రంలో పెండింగ్లో ఉన్న ఫీజు రీయింబర్స్మెంట్ విడుదల చేయాలని, కడప ఉక్కు పరిశ్రమ నిర్మాణం పూర్తి చేసి నిరుద్యోగ యువతకు ఉపాధి అవకాశం కల్పించాలని, ప్రైవేట్ మెడికల్ కళాశాలల ప్రైవేటీకరణను ఆపాలని, జీవో నంబర్ 77ను రద్దు చేయాలని వారు డిమాండ్ చేశారు. సంక్షేమ హాస్టళ్లలో చదువుతున్న విద్యార్థులకు కాస్మోటిక్ మెస్ ఛార్జీలు పెంచాలని, ఖాళీగా ఉన్న వార్డెన్ పోస్టులు భర్తీ చేయాలని, ఎన్నికల హామీల ప్రకారం నిరుద్యోగ యువతకు నిరుద్యోగ భృతి ఇవ్వాలని వారు డిమాండ్ చేశారు.

విద్యార్థి, యువజన సమస్యలపై రాష్ట్రవ్యాప్తంగా చైతన్య కార్యక్రమాలు నిర్వహించి, ప్రజాస్వామ్య పద్ధతిలో ఉద్యమాలను నిర్మించాల్సిన అవసరం ఉందని వక్తలు తెలిపారు. విద్యారంగ పరిరక్షణ, సామాజిక న్యాయం, విద్యార్థి-యువజన హక్కుల సాధన కోసం పీఆర్ఎస్వైఎఫ్ మరింత విస్తృతంగా పనిచేయాలని ఆకాంక్షించారు. భవిష్యత్ కార్యాచరణపై మహాసభల్లో కీలక నిర్ణయాలు తీసుకోనున్నట్లు నిర్వాహకులు తెలిపారు.

ఈ కార్యక్రమంలో ఏఐఎస్బీ రాష్ట్ర అధ్యక్షులు రాజేంద్రప్రసాద్, పీఎస్యు జిల్లా అధ్యక్షులు గోపి, జిల్లా అధ్యక్షులు జగన్ రాథోడ్, ఏఐబీఎస్ఎస్ రాష్ట్ర అధ్యక్షులు జగన్ రాథోడ్, పీఆర్ఎస్వైఎఫ్ నాయకులు ఓరుగంటి నాగేంద్రబాబు, పి.వెంకటరమణ, రఘునాద్, సాయినాథ్ రెడ్డి, హరికృష్ణా రెడ్డి, వేణు, విద్యార్థులు, యువజనులు, వివిధ ప్రజా సంఘాల ప్రతినిధులు పెద్ద సంఖ్యలో పాల్గొన్నారు.