స్థానిక ఎన్నికలు ఖరీదయ్యాయి: నోట్ల కట్టలు తెగితేనే ఓటు

అధిక ఖర్చుతో ఎన్నికల సంగ్రామం

మున్సిపల్ చైర్మన్, కౌన్సిలర్ల నుంచి గ్రామ స్థాయిలో సర్పంచ్, ఎంపీటీసీ, జడ్పీటీసీల వరకు ఎన్నికల ఖర్చు తడిసి మోపెడవుతోంది. భూములు తాకట్టు పెట్టడం, బంధుమిత్రుల వద్ద అప్పులు తీసుకోవడం, కాంట్రాక్టర్లతో ఒప్పందాలు కుదుర్చుకుని పెట్టుబడులు సమకూర్చుకుని స్థానిక ఎన్నికల సంగ్రామానికి సిద్ధం కావాల్సిన పరిస్థితి ఏర్పడింది.

ప్రచార ఖర్చులు, పోలింగ్, కౌంటింగ్ ఏజెంట్ల నియామకం, భారీగా వాహనాల వినియోగం, కార్యకర్తలకు చెల్లింపులు, జెండాలు, రోజువారీ ప్రచారాలు, బలహీన వర్గాలకు హామీలు, ఓట్ల కొనుగోలుకు భారీగా డబ్బు పంపిణీ చేయాల్సి వస్తోంది.

నిబంధనలకు మించి ఖర్చు

ఎన్నికల కమిషన్ నిర్దేశించిన పరిమితులకు మించి, చెప్పిన లెక్కలకు ఐదారు రెట్లు ఖర్చు పెట్టాల్సి వస్తోందని అభ్యర్థులు చెబుతున్నారు. అధికారికంగా లెక్కలు తక్కువ చూపించినా, వాస్తవ ఖర్చు మాత్రం లక్షల్లో ఉంటోంది.

గెలిచిన తర్వాత ఆ పెట్టుబడిని రాబట్టుకునేందుకే చాలా మంది ప్రయత్నిస్తారనే విమర్శలు వినిపిస్తున్నాయి.