కడపలో వైసీపీలోకి భారీగా చేరికలు: 120 కుటుంబాలకు అంజాద్ బాషా పార్టీ కండువా

పార్టీ బలోపేతంపై నాయకుల వ్యాఖ్యలు

ఈ కార్యక్రమంలో మాజీ మేయర్ పాక సురేష్, సీనియర్ నాయకులు సుభాన్ బాషా, మాజీ డిప్యూటీ మేయర్ నిత్యానంద రెడ్డి, యువజన విభాగం రాష్ట్ర ప్రధాన కార్యదర్శి షేక్ ఉమైర్ పాల్గొన్నారు. ఈ సందర్భంగా అంజాద్ బాషా మాట్లాడుతూ అధికారంలో ఉన్నా, ప్రతిపక్షంలో ఉన్నా ప్రజల పక్షాన నిలబడటమే వైఎస్సార్ కాంగ్రెస్ పార్టీ విధానమన్నారు. వైఎస్సార్ కాంగ్రెస్ పార్టీలో చేరికలతో పార్టీ మరింత బలపడుతోందని, పార్టీలో చేరుతున్న ప్రతి ఒక్కరికీ భవిష్యత్తులో సముచిత స్థానం కల్పించే బాధ్యత పార్టీ తీసుకుంటుందన్నారు.

జగన్ ఐదేళ్ల పాలన, చంద్రబాబు పాలనను ప్రజలు బేరీజు వేసుకోవాలన్నారు. వైఎస్సార్ కాంగ్రెస్ పార్టీ హయాంలో సంక్షేమ పథకాలను ప్రకటించిన సమయానికి అమలు చేసిన ఘనత జగన్ దేనన్నారు.

అభివృద్ధిపై ఎమ్మెల్యేకు సవాల్

కడప అభివృద్ధిపై ఎమ్మెల్యే మాధవి రెడ్డికి సవాల్ విసిరారు. కడప అభివృద్ధి కోసం ఎన్ని నిధులు తెచ్చారో చెప్పాలన్నారు. వైఎస్సార్ కాంగ్రెస్ పార్టీ హయాంలో మంజూరైన నిధులతో జరుగుతున్న పనులకు ప్రస్తుత ప్రభుత్వం క్రెడిట్ తీసుకోవడం సరికాదన్నారు. కడప నగరానికి శాశ్వత తాగునీటి కోసం వైఎస్సార్ కాంగ్రెస్ పార్టీ హయాంలో నిధులు మంజూరు చేసి పనులు చేపట్టామని, వందల కోట్లు వెచ్చించి నిర్మించిన ట్యాంకుల ద్వారా నీటిని అందించడంపై ప్రభుత్వం దృష్టి పెట్టాలన్నారు.

స్థానిక సంస్థల ఎన్నికల్లో వైఎస్సార్ కాంగ్రెస్ పార్టీ అభ్యర్థుల విజయానికి ప్రతి కార్యకర్త సైనికుడిలా పనిచేయాలని, ఫ్యాన్ మళ్లీ గిరగిరా తిరిగేలా పనిచేయాలని పిలుపునిచ్చారు. వైఎస్సార్ కాంగ్రెస్ పార్టీ కార్యకర్తలు కేసులకు భయపడరని స్పష్టం చేశారు.