స్థానిక సంస్థల ఎన్నికలకు పటిష్ట భద్రత: ఎస్పీ ధీరజ్ కునుబిల్లి దిశానిర్దేశం

ఈ సందర్భంగా ఎస్పీ పలు కీలక ఆదేశాలు జారీ చేశారు. రెవెన్యూ, మున్సిపల్ అధికారులతో కలిసి జిల్లాలోని అన్ని పోలింగ్ కేంద్రాలను తప్పనిసరిగా క్షేత్ర స్థాయిలో తనిఖీ చేయాలని సూచించారు. సమస్యాత్మక, అతి సమస్యాత్మక కేంద్రాలను ముందుగానే గుర్తించి, అక్కడ అదనపు బలగాలను మోహరించాలని సూచించారు.

పాత నేరస్థులు, గత ఎన్నికల్లో గొడవలు సృష్టించిన వ్యక్తులను తక్షణమే బైండోవర్ చేయాలని, అసాంఘిక శక్తులను అరికట్టేందుకు ముమ్మరంగా కార్డన్ అండ్ సెర్చ్ ఆపరేషన్లు నిర్వహించాలని ఆదేశించారు.

అక్రమ మద్యం, డబ్బు, బహుమతుల రవాణాను అరికట్టేందుకు జిల్లా సరిహద్దుల్లో, ముఖ్య కూడళ్లలో చెక్ పోస్టులు ఏర్పాటు చేయాలని సూచించారు.

ఎన్నికల పర్యవేక్షణ కోసం సీసీ కెమెరాలు, డ్రోన్లను వినియోగించాలని, ప్రత్యేక కమాండ్ కంట్రోల్ సెంటర్ నుంచి పరిస్థితిని ఎప్పటికప్పుడు సమీక్షించాలని తెలిపారు.

సోషల్ మీడియాలో తప్పుడు ప్రచారాలు, ఫేక్ న్యూస్ సృష్టించే వారిని గుర్తించి, వారిపై తక్షణమే కఠిన చర్యలు హెచ్చరించారు.

ఓటర్లు నిర్భయంగా ఓటు వేసేలా పోలీసులు గ్రామాల్లో విస్తృతంగా పర్యటించాలని, పల్లెనిద్ర వంటి కార్యక్రమాలు చేపట్టి వారిలో ధైర్యం నింపాలని సూచించారు.

జిల్లాలో లైసెన్స్ కలిగిన తుపాకులు, ఇతర ఆయుధాలు ఉన్నవారిని గుర్తించి, వెంటనే వాటిని పోలీస్ స్టేషన్లలో డిపాజిట్ చేయించాలని ఆదేశించారు.

ఓటర్లు ఎలాంటి ప్రలోభాలకు లొంగకుండా, ఎవరి బెదిరింపులకు భయపడకుండా తమ ఓటు హక్కును స్వేచ్ఛగా వినియోగించుకోవాలని ఎస్పీ ధీరజ్ కునుబిల్లి ప్రజలకు విజ్ఞప్తి చేశారు.