యూమీ ఎగైనెస్ట్ ది వరల్డ్: ఆల్మా, వాడిమ్ ప్రేమకథలో అసలు ట్విస్ట్ ఇదే

వాడిమ్ జీవితంలో చిన్నప్పటి నుంచే ఎన్నో సమస్యలు ఉంటాయి. అతని తల్లిదండ్రులు కారు ప్రమాదంలో మరణించడంతో అతను అనాథాశ్రమానికి చేరుకున్నాడు. అక్కడ ఫెలిక్స్తో స్నేహం ఏర్పడుతుంది. ఇద్దరూ కలిసి పెరుగుతారు. తరువాత ఆస్కార్ అనే వ్యక్తి వారి జీవితాల్లోకి వచ్చాడు. బయటకు అతను వాడిమ్కు సహాయం చేసే వ్యక్తిలా కనిపించినా, అసలు విషయం వేరేలా ఉంది. వాడిమ్ను, ఫెలిక్స్ను డ్రగ్స్ వ్యాపారంలోకి నెట్టేది ఆస్కారే. ఆ పని నుంచి బయటపడాలని ప్రయత్నిస్తే తమపై నేరాలు మోపి జైలుకు పంపిస్తానని అతను బెదిరిస్తుంటాడు. ఇదే సమయంలో వాడిమ్ తన తల్లిదండ్రుల మరణం నిజంగా ప్రమాదమేనా అనే అనుమానంతో వారి గతాన్ని తెలుసుకునే ప్రయత్నం చేస్తున్నాడు.

ఆల్మా, వాడిమ్ దగ్గరవుతున్న సమయంలోనే ఎవరో తెలియని వ్యక్తి వారికి బెదిరింపు సందేశాలు పంపడం ప్రారంభించాడు. వారి వ్యక్తిగత జీవితానికి సంబంధించిన ఫొటోలు, సమాచారాన్ని కూడా పంపిస్తుంటాడు. వాడిమ్ డ్రగ్స్ వ్యవహారంలో ఉన్నాడనే విషయం క్యాంపస్లో ప్రచారం కావడంతో ఆల్మా కూడా అయోమయంలో పడింది. చివరకు వాడిమ్ తన నిజాన్ని ఆల్మాకు చెప్పాడు. తాను డ్రగ్స్ వ్యాపారంలో ఉన్నప్పటికీ అది తన స్వచ్ఛంద నిర్ణయం కాదని వివరించాడు. ఆస్కార్ తనను, ఫెలిక్స్ను బెదిరించి ఈ పనిలో కొనసాగిస్తున్నాడని చెప్పాడు. ఆల్మా అతని పరిస్థితిని అర్థం చేసుకుని అతనికి అండగా నిలిచింది. ఇద్దరూ తమ ప్రేమను కొనసాగించాలని నిర్ణయించుకున్నారు. ఇక మనిద్దరం ప్రపంచం మొత్తానికి వ్యతిరేకంగా ఉన్నా కలిసి ఉంటాం అనే భావనతో ముందుకు సాగారు.

ఆల్మా తండ్రికి ఆమె వాడిమ్తో సంబంధం ఉన్న విషయం తెలిసింది. ఆల్మా కుటుంబం ఈ సంబంధాన్ని అంగీకరించలేదు. వాడిమ్ ప్రమాదకరమైన వ్యక్తి అని వారు భావించారు. మరోవైపు ఆస్కార్ తన పన్నాగాన్ని అమలు చేశాడు. వాడిమ్ను నేరంలో ఇరికించేలా పరిస్థితులు సృష్టించాడు. పోలీసులు వాడిమ్ కారులో డ్రగ్స్ను గుర్తించి అతడిని అరెస్టు చేశారు. వాడిమ్కు పది సంవత్సరాల వరకు జైలు శిక్ష పడే అవకాశం ఉందని ఆల్మాకు తెలిసింది. అతడిని బయటకు తీసుకురావాలంటే తన కుటుంబం చెప్పిన మాట వినాల్సిన పరిస్థితి ఏర్పడింది.

ఇక్కడే సినిమా కథలో అతిపెద్ద మలుపు వచ్చింది. ఆల్మా తండ్రి ఒక షరతు పెట్టాడు. వాడిమ్ను జైలు నుంచి బయటకు తీసుకురావడానికి తాను సహాయం చేస్తానని, కానీ దానికి ప్రతిగా ఆల్మా తనతో కలిసి పారిస్కు రావాలని, కుటుంబ న్యాయ సంస్థలో పని చేయాలని చెప్పాడు. అంతేకాదు.. ఇకపై వాడిమ్ను ఎప్పటికీ కలవకూడదని స్పష్టం చేశాడు. ఆల్మాకు ఇది అత్యంత బాధాకరమైన నిర్ణయం. ఒకవైపు తన ప్రేమ, మరోవైపు వాడిమ్ భవిష్యత్తు. చివరకు ఆల్మా వాడిమ్ను కాపాడటానికే అతడిని వదిలిపెట్టాలని నిర్ణయించుకుంది.

ఆల్మా తీసుకున్న నిర్ణయం వాడిమ్పై ప్రేమ లేకపోవడం వల్ల కాదు. వాడిమ్ జైలుకు వెళ్లకుండా ఉండేందుకు, అతని జీవితాన్ని కాపాడేందుకు ఆమె తన ప్రేమను త్యాగం చేసింది. ఆమె ఒక న్యాయవాదిని సంప్రదించి వాడిమ్ కేసుకు సంబంధించిన సమాచారాన్ని సేకరించే ప్రయత్నం కూడా చేసింది. అనంతరం వాడిమ్కు వీడ్కోలు చెబుతూ, తన నిర్ణయానికి అసలు కారణాన్ని ఒకరోజు అతనికి వివరిస్తానని చెప్పింది. వాడిమ్ మాత్రం ఆల్మా తనను నిజంగానే వదిలేసిందని భావించాడు.

కొంతకాలం తర్వాత వాడిమ్ బెయిల్పై విడుదలయ్యాడు. అతడిపై దేశం విడిచి వెళ్లకూడదనే ఆంక్షలు ఉన్నాయి. అదే సమయంలో ఆల్మా తన జీవితాన్ని కుటుంబం కోరుకున్న దిశగా తీసుకెళ్లాల్సి వచ్చింది. కానీ వాడిమ్ను మాత్రం ఆమె మర్చిపోలేకపోతోంది. కొంతకాలం తర్వాత వాడిమ్కు ఆల్మా నుంచి ఒక సందేశం అందింది. తాను అతడిని వదిలిపెట్టినట్టు కనిపించినా, అది తన నిజమైన కోరిక కాదని ఆల్మా వివరించింది. ఆమె తన ప్రేమను త్యాగం చేసినప్పటికీ, వాడిమ్ను తన మనసులో నుంచి మాత్రం తొలగించలేకపోతోంది.

సినిమా పూర్తిగా సుఖాంతంతో ముగియలేదు. ఆల్మా, వాడిమ్ వెంటనే మళ్లీ కలుసుకోలేదు. వారి భవిష్యత్తు కూడా స్పష్టంగా చూపించలేదు. అయితే చివరి సన్నివేశం ద్వారా వారి ప్రేమకథ పూర్తిగా ముగియలేదనే సంకేతం ఇచ్చింది. వాడిమ్ తన జీవితాన్ని కొత్తగా ప్రారంభించేందుకు ప్రయత్నిస్తుండగా, ఆల్మా కూడా తన నిర్ణయం వెనుక ఉన్న నిజాన్ని అతనికి ఎప్పుడో చెప్పాలని కోరుకుంది. అందుకే సినిమా ముగింపు ఇద్దరూ విడిపోయారు అనే దానికంటే.. వారి కథ ఇంకా పూర్తికాలేదు అనే భావనను ప్రేక్షకుడికి ఇచ్చింది.

ఈ సినిమా ఎమ్మా గ్రీన్ రాసిన ఫ్రెంచ్ నవల ఆధారంగా రూపొందించబడింది. ఈ కథకు కొనసాగింపుగా మరో రెండు పుస్తకాలు కూడా ఉన్నాయి. అందువల్ల భవిష్యత్తులో ఆల్మావాడిమ్ కథను కొనసాగించే అవకాశం కథలోనే కనిపిస్తుంది.