జాతీయ రహదారులపై భద్రతా ప్రమాణాల అమలు: సుప్రీంకోర్టు ఆదేశాలపై కామారెడ్…

సమావేశానికి అదనపు కలెక్టర్ విక్టర్ అధ్యక్షత వహించగా, ఎన్‌హెచ్‌ఏఐ డీజీఎం ఆర్. శాలిని, ఆర్‌అండ్‌బీ డిప్యూటీ ఎగ్జిక్యూటివ్ ఇంజనీర్ వినోద్, జిల్లా రవాణా అధికారి టి. సంతోష్ కుమార్‌తో పాటు వివిధ శాఖల అధికారులు పాల్గొన్నారు.

ఈ సందర్భంగా జాతీయ రహదారులపై ప్రమాదాలకు కారణమవుతున్న బ్లాక్‌స్పాట్ల గుర్తింపు, వాటి సత్వర పరిష్కారం, హెచ్చరిక బోర్డుల ఏర్పాటు, రోడ్ మార్కింగ్స్, క్రాష్ బ్యారియర్లు, స్ట్రీట్ లైటింగ్, రోడ్డు భద్రతా మౌలిక వసతుల అభివృద్ధి, అత్యవసర వైద్య స్పందన వ్యవస్థ బలోపేతం, రహదారి ఇంజినీరింగ్ లోపాల సవరణ వంటి అంశాలను సమగ్రంగా సమీక్షించారు. ప్రమాదాల నివారణకు అన్ని శాఖలు పరస్పర సమన్వయంతో పనిచేయాల్సిన అవసరాన్ని అధికారులు ప్రస్తావించారు.

అదనపు కలెక్టర్ విక్టర్ మాట్లాడుతూ, రోడ్డు భద్రత విషయంలో ఎలాంటి నిర్లక్ష్యానికి తావులేకుండా జాతీయ రహదారులపై అన్ని భద్రతా ప్రమాణాలను కచ్చితంగా అమలు చేయాలని అధికారులను ఆదేశించారు. సుప్రీంకోర్టు మార్గదర్శకాలను నిర్దేశిత గడువులోగా అమలు చేసి, పెండింగ్ పనులను త్వరితగతిన పూర్తి చేయాలని సూచించారు. అనంతరం అధికారులు తమ శాఖల పరిధిలో చేపట్టిన చర్యలను వివరించగా, జిల్లా స్థాయి అనుసరణ నివేదికను సిద్ధం చేసి ప్రభుత్వానికి పంపించాలని సమావేశంలో నిర్ణయించారు.