డయల్-112 సత్వర స్పందన: ఆత్మహత్యాయత్నానికి పాల్పడుతున్న యువతిని కాపాడిన పోలీసులు

రైల్వే కోడూరు పట్టణానికి చెందిన 22 ఏళ్ల యువతి కుటుంబ సమస్యలతో తీవ్ర మనోవేదనకు గురై, రైల్వే స్టేషన్ పరిసరాల్లో ఆత్మహత్యాయత్నానికి ప్రయత్నిస్తోందని డయల్-112కు సమాచారం అందింది. వెంటనే రైల్వే కోడూరు పట్టణ పోలీసులు క్షణాల్లో స్పందించి ఘటనా స్థలానికి చేరుకుని యువతిని సురక్షితంగా రక్షించారు.

పోలీసుల కౌన్సెలింగ్

అనంతరం పోలీసులు ఆమెకు ధైర్యం చెప్పి కౌన్సెలింగ్ ఇచ్చారు. జీవితంలో ఎదురయ్యే సమస్యలను ధైర్యంగా ఎదుర్కోవాలని, ఆత్మహత్య పరిష్కారం కాదని వివరించారు. కుటుంబ సభ్యులకు సమాచారం ఇచ్చి వారి సమక్షంలో యువతిని సురక్షితంగా అప్పగించారు.

యువతకు సూచనలు

యువత తీవ్ర ఒత్తిడికి గురైనప్పుడు ఒంటరిగా ఉండకుండా తల్లిదండ్రులు, స్నేహితులు, కౌన్సెలర్లతో మాట్లాడాలని పోలీసులు సూచించారు. చిన్న సమస్యకే తొందరపాటు నిర్ణయాలు తీసుకోవద్దని, జీవితం విలువైనదని గుర్తుంచుకోవాలని కోరారు.

ఆపదలో ఉన్నవారికి తక్షణ సహాయం కోసం డయల్-112 ఎల్లప్పుడూ అందుబాటులో ఉంటుందని, ఎవరైనా ఇలాంటి పరిస్థితిలో కనిపిస్తే వెంటనే 112కు సమాచారం ఇవ్వాలని పోలీసులు విజ్ఞప్తి చేశారు. యువతి ప్రాణాలు కాపాడిన రైల్వే కోడూరు పోలీసుల అప్రమత్తతను జిల్లా ఎస్పీ ఎల్. సుబ్బరాయుడు అభినందించారు.