ఆదిలాబాద్లోని రాజీవ్గాంధీ వైద్య విజ్ఞాన సంస్థ (రిమ్స్)లో జరిగిన అగ్నిప్రమాదంపై ఏర్పాటు చేసిన ఉన్నతస్థాయి కమిటీ విచారణను పూర్తి చేసింది. ప్రమాదానికి దారితీసిన పరిస్థితులు, విద్యుత్ వ్యవస్థలో లోపాలు, అగ్నిమాపక భద్రతా ప్రమాణాలు, ఆసుపత్రి నిర్మాణ భద్రత వంటి అంశాలను కమిటీ పరిశీలించింది.
కమిటీ సభ్యులు ప్రమాదం జరిగిన ప్రత్యేక నవజాత శిశు సంరక్షణ విభాగాన్ని పరిశీలించి, అక్కడ పనిచేస్తున్న సిబ్బంది నుంచి వివరాలు సేకరించారు. ప్రమాద సమయంలో జరిగిన పరిణామాలను తెలుసుకునేందుకు నిఘా కెమెరాల దృశ్యాలు, ఎలక్ట్రానిక్ పరికరాలను కూడా పరిశీలించినట్లు అధికారులు తెలిపారు. విద్యుత్, అగ్నిమాపక, భవన నిర్మాణ భద్రతకు సంబంధించిన అంశాలపై తనిఖీలు నిర్వహించారు.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
విద్యుత్ లోపాలపైనా దృష్టి
ప్రాథమిక సమాచారం ప్రకారం ఏసీ యూనిట్లో విద్యుత్ షార్ట్ సర్క్యూట్ కారణంగా మంటలు చెలరేగినట్లు అధికారులు అనుమానించారు. అయితే ప్రమాదానికి అసలు కారణం, భద్రతా ప్రమాణాల అమలులో ఏవైనా లోపాలు ఉన్నాయా అనే అంశాలను పూర్తిస్థాయిలో నిర్ధారించేందుకు కమిటీ దర్యాప్తు చేపట్టింది. ప్రమాద సమయంలో విధుల్లో ఉన్న సిబ్బంది, సంబంధిత అధికారుల నుంచి కూడా వివరాలు తీసుకున్నారు.
