విద్యాసంస్థల్లో మత్తు పదార్థాల ముప్పు: యువత భవితకు పెను ప్రమాదం

ఈ మత్తు జ్వాలల నుంచి భావిభారతాన్ని కాపాడుకోవడం తక్షణ కర్తవ్యం. విద్యాసంస్థల చుట్టూ 100 మీటర్ల పరిధిని డ్రగ్ ఫ్రీ జోన్గా ప్రకటించి, సీసీ కెమెరాలు, నిఘా వర్గాల పర్యవేక్షణ పెంచాలి. కేవలం అంకెలు చూపే కేసులతో సరిపెట్టకుండా, ఎన్.డి.పి.ఎస్ చట్టం కింద పెడ్లర్లపై కఠిన చర్యలు తీసుకుంటూ డ్రగ్స్ సరఫరా చేసే మూలాలను ఛేదించాలి. పోలీసులు, పాఠశాల/కళాశాల యాజమాన్యాలు, హాస్టల్ నిర్వాహకులతో ప్రత్యేక సమన్వయ కమిటీలు ఏర్పాటు చేయాలి.

పాఠశాలలు, తల్లిదండ్రుల బాధ్యత

పాఠశాలలు, కళాశాలల బాధ్యత కూడా ఇందులో కీలకమైనది. విద్యార్థుల ప్రవర్తనలో ఆకస్మిక మార్పులు, ఏకాగ్రత లోపించడం, చదువుపై శ్రద్ధ తగ్గడం వంటి సంకేతాలను గమనించిన వెంటనే తల్లిదండ్రులకు సమాచారం అందించాలి. ప్రతి నెలా నిపుణులతో అవగాహన సదస్సులు, కౌన్సెలింగ్ కార్యక్రమాలు నిర్వహించాలి.

పునరావాసం కీలకం

అన్నింటికంటే ముఖ్యం.. వ్యసనానికి గురైన పిల్లలను నేరస్థులుగా కాకుండా బాధితులుగా చూడటం. వారిపై ముద్ర వేయకుండా, సరైన డి-అడిక్షన్ కేంద్రాలకు తరలించి పునరావాసం కల్పించాలి.

మత్తు మాయలో నశించిపోతున్నది ఒక వ్యక్తి మాత్రమే కాదు.. ఒక కుటుంబపు నమ్మకం, దేశపు పురోగతి. పోలీసు వ్యవస్థ, విద్యాసంస్థలు, తల్లిదండ్రులు కలసికట్టుగా పోరాడినప్పుడే ఈ మత్తు రాక్షసుడిని తుదముట్టించి, యువశక్తికి సరైన భవిష్యత్తును అందించగలం.