ఏఐతో గ్రామీణ భారతదేశం మారుతుందా రిప్పుల్స్ క్యాంపస్లో విద్యార్థుల ఆసక్తికర చర్చ

మండలంలోని కందరపల్లి గ్రామంలో గల రిప్పుల్స్ లెర్నింగ్ క్యాంపస్ పాఠశాల ఆధ్వర్యంలో కెన్ ఏఐ ట్రాన్స్ఫార్మ్ రూరల్ ఇండియా అనే అంశంపై శనివారం ఒక ఆసక్తికరమైన చర్చా కార్యక్రమం జరిగింది. విద్యార్థులు కృత్రిమ మేధస్సు వల్ల కలిగే అవకాశాలు, సవాళ్లపై తమ వాదనలను వినిపించారు.

జుక్కల్ సేవా సంకల్ప్ అభియాన్లో భాగంగా జరిగిన ఈ కార్యక్రమంలో నాలుగు హౌస్లకు చెందిన విద్యార్థులు ఉత్సాహంగా పాల్గొన్నారు. వ్యవసాయం, విద్య, వైద్యం, ఉపాధి, డిజిటల్ సేవలు వంటి రంగాల్లో ఏఐ వినియోగంతో కలిగే ప్రయోజనాలను వారు వివరించారు.

అదే సమయంలో, డిజిటల్ సదుపాయాల కొరత, గోప్యత, ఉద్యోగాలపై ప్రభావం వంటి అంశాలను కూడా విద్యార్థులు ప్రస్తావించారు. ఈ చర్చలో పాల్గొన్న విద్యార్థుల విషయ పరిజ్ఞానం, వాదనా పటిమ, భాషా ప్రావీణ్యం, సమయపాలన, ఆత్మవిశ్వాసం ఆధారంగా న్యాయనిర్ణేతలు విజేతలను ఎంపిక చేశారు.